KAMATI YA MAZISHI MKOA WA DODOMA YATOA UTARATIBU WA KUUAGA MWILI WA MAREHEMU MHE. JOHN G. TUPPA

TAARIFA KWA UMMA

 

Mwili wa aliyekuwa Mkuu wa Mkoa wa Mara Marehemu Mhe. John Gabriel Tuppa unatarajiwa kuwasili Mjini Dodoma kwa njia ya ndege leo Alhamisi tarehe 27 Machi 2014 majira ya saa kumi na nusu jioni ukitokea mkoani Mara kwa kupitia Mwanza. Baada ya mwili kuwasili uwanja wa ndege wa Dodoma, utapokelewa na viongozi mbalimbali pamoja na wananchi ambapo utapelekwa kwenye chumba cha kuhifadhia maiti katika hospitali ya rufaa ya mkoa wa Dodoma.

Ratiba ya siku ya Ijumaa ya tarehe 28 Machi 2014 ni kwamba, mwili wa marehemu utapelekwa kwenye uwanja wa Nyerere Square kuanzia saa tatu asubuhi ambapo pataendeshwa Ibada ya kuuaga mwili wa marehemu na kutoa salamu za rambirambi na baadaye kuuaga mwili wa marehemu. Shughuli nzima ya tarehe 28 Machi 2014 itaanza saa tatu kamili asubuhi na kukamilika saa nane kamili mchana ambapo safari ya kuelekea Kilosa, Morogoro ambako Mazishi yatafanyika tarehe 29 Machi 2014.

Hivyo, wananchi wanaombwa na kuhimizwa kujitokeza kwa wingi uwanjani wakati wa kuupokea mwili wa marehemu na siku ya kuuaga mwili wa marehemu pale Nyerere Square.

“Mwanga wa Milele Umwangazie Ee Bwana Apumzike kwa Amani Ndugu yetu Mhe. John Gabriel Tuppa, Amina”

TAARIFA HII IMETOLEWA NA KAMATI YA URATIBU YA MSIBA YA MKOA WA DODOMA

27 Machi 2014