WASWEKWA NDANI SAA 3 KWA KUVAA VIMINI NCHINI UGANDA

Sheria nchini Uganda inawakataza wanawake kuvaa nguo fupi za kuonyesha sehemu zao za siri

Wanawake wawili jana walizuiliwa kwa saa 3 na mahakama moja nchini Uganda kwa kuingia mahakamani wakiwa wamevaa 'Mini Skirt'. Hii ni baada ya jaji aliyekuwa mahakamani humo kusema kuwa wanawake hao walikuwa wamevaa nguo zisizofaa.

Kwa mujibu wa taarifa kwenye mtandao wa Daily Nation, nchini Kenya, Bi Prosy Nasuna aliyekuwa amemshitaki Bi. Jane Nabukenya kwa kukosa kumlipa deni lake la shilingi milioni 3 za Uganda wote ilisemekana hawakuvaa nguo za heshima na kutatiza kikao cha mahakama.

Walipoingia mahakamani katika eneo la Bukomansimbi jana Prosy pamoja na mshitakiwa walijikuta matatani.

Kabla ya kuchukuliwa hatua kwa mavazi yao, watu walipiga mayowe mahakamani humo wakisema kuwa wawili hao walikuwa wamevaa visivyo kulingana na sheria iliyopitishwa mwezi Februari, 2014 kuhusiana na kupiga marufuku mavazi mafupi. Sheria hiyo inasema kuwa yeyote atakeyeonesha sehemu za siri za mwili wake hadharani na kusababisha hisia fulani miongoni mwa watu, anakuwa amekiuka sheria.

Minong'ono na kelele za watu zilisababisha hakimu kuamuru kukamatwa kwao kwa kwenda kinyume na sheria na pia kwa kuhujumu wa mahakama. Alisema kuwa kesi haikuendelea kutokana na mavazi yao na kwa hivyo kosa lao lilikuwa kusababisha usumbufu mahakamani kwa kuvaa 'Mini Skirt'.

Hakimu aliwahukumu jela kwa saa 3 wanawake hao na kuahirisha kesi yao hadi Machi 13,2014. (Chanzo ni BBC Swahili).