AISHA MADINDA AFARIKI GAFLA JANA

Aisha Mohammed Mbegu 'Aisha Madinda' wakati wa Uhai wake.

Aliyekuwa Mnenguaji na Muimbaji nguli wa Bendi ya Twanga Pepeta Aisha Madinda amefariki dunia jana Jijini Dar es salaam. Habari imethibitishwa na mmiliki wa Bendi ya African Stars maarufu kama Twanga Pepeta, Asha Baraka. Mkurugenzi wa bendi hiyo alisema alipewa taarifa na Daktari mmoja wa Hospitali ya Mwananyamala kuwa wameona kama mwili wa Aisha Madinda hospitalini hapo, ndipo akatuma watu kwenda kuangalia akiwemo Luiza Mbutu ili kuhakikisha kama kweli ni yeye ndipo walipogundua kuwa ni yeye.

" Mimi nipo njiani natoka Kigoma kuja Dar es Salaam, ni habari ya kusikitisha sana maana Aisha amefariki katika mazingira ya kutatanisha sana, jana alikuwa mzima na anachati na watu kwenye simu leo napigiwa simu mwili wake umekutwa umehifadhiwa kwenye hospitali ya Mwananyamala, hata sielewi nini kimetokea" Alisema Asha Baraka.

 Hata hivyo, taarifa ambazo hazijathibitishwa zinadai kuwa Madinda aliita dereva wa Bajaj na kuomba apelekwe Hospitali ya Mwananyamala   na ndipo alipokumbwa na mauti akiwa njiani bila dereva huyo kujua mpaka alipofika hospitalini hapo.

Inaelezwa kuwa msiba wa Marehemu Aisha uko Kigamboni na huenda akazikwa leo huko huko.

Mungu ailaze roho ya Marehemu Aisha Madinda mahali pema peponi , Amina!